1

【行山學歷史】九龍仔公園格仔山

九龍仔公園格仔山

路線: 九龍塘浸大逸夫校園 / 九龍城延文禮士道 / 樂富聯合道 à九龍仔公園à格仔山à樂富食水配水庫à沿路折返

格仔山(Checkerboard Hill)原名九龍仔山，位於九龍仔公園及樂富公園中間，高海拔103.9米。1955年舊啟德機場擴建跑道，九龍仔山塗上紅白格仔圖案，指示機師降落舊啟德機場13號跑道，啟德停用後，紅白格仔被塗灰及種植松樹遮蔽。現址有樂富食水配水庫及上面的草地公園。TVB劇集衝上雲霄曾在格仔山取景，劇中角色Sam  (吳鎮宇飾)和Vincent (馬德鐘飾)餵白鴿大談飛行夢的地方，正是格仔山的紅白格仔斜坡。現時此處為附近居民的晨運勝地，其日落和夜景亦吸引了不少攝影愛好者，同時頗受旁邊浸會大學的學生歡迎。

(啟德還在使用時的格仔山)

當心陡峭梯級及碎石路滑腳

沿公園內馬路前往九龍仔公園網球場，網球場前右側擋土牆有一條斜坡維修樓梯，就是格仔山的入口，樓梯的入口有綠色鐵閘阻擋，遊人可以於旁邊石堆輕鬆跨過。

遊人可沿白色箭咀指示登上格仔山，擋土牆入口的鐵閘側邊有很大的隙縫，鐵閘形同虛設。( -_____- )

跨過閘口後有陡峭的石屎梯登山，請緊握扶手。

樓梯頂會再看到白色箭咀，指示著左右兩個方向。

1. 如果向左走，可以觀看格仔山舊啟德機場的格仔指示，以及登上山頂鐵絲網外圍的晨運客花園。
2. 如果向右走，可以登上鐵絲網內樂富食水配水庫公園。

向左走：

沿擋土牆種有松樹的頂部通道前行，抬頭可以望到右邊的格仔痕跡，直到盡頭有碎石小梯轉右再上一層。

地上一直會有白色箭咀和螢光粉引路，方便夜間上山睇夜景(兼劈酒，沿途地下有好多啤酒罐)。

碎石小梯頂部就接近山頂，右邊的通道正是格仔的位置。

走上剛才的山頂樓梯，看見下圖白色箭咀，view就是看日落夜景的絕佳位置，轉左就是山頂鐵絲網外的晨運客花園。

世界級１８０度九龍塘豪宅景，可以遠眺港島，睇煙花、吹水、夜話、表白一流！

晨運客花園有環繞格仔山頂的人工小徑，環境優美。

於小徑上下看樂富食水配水庫公園草地上野餐踢波的男女和菲律賓姐姐。

格仔山正式的山頂，有一枝小型三角測量站，此處為海拔103.9米。

 

向右走：

右邊的盡頭有白色扶手繩，沿繩旁的小徑上山，中途會看見綠色汞房。

於汞房後方繞過，便會到達樂富食水配水庫公園入口。

———————————————————————

想睇更多香港的故事？
Like 「港識多史」的
【Facebook】
http://www.facebook.com/wetoasthk
【website】http://www.wetoasthk.com
【IG】http://instagram.com/wetoasthk