【石寓】歷史三級建築 原本是修車房？
半山自開埠以來都是高官顯貴的居住地，即然是洋人聚居地（當然也有少數華人精英住在半山，而首位成功向香港總督會同行政局申請住在半山的華人就是何東了），當然留下不少具殖民地色彩的建築。之不過靚屋就不一定係畀人住，仲可以有好多估佢唔到的用途。
其中位於西半山區的旭龢道就是1920年代修車房的集中地，咩話？喺半山整車？正如七仔總有一間喺左近好方便，住半山的人架車壊了走不遠，喺返半山整車就夠晒方便喇，所以旭龢道的修車房都服務了住在干德道、旭龢道及寶珊道的富戶。
而「石寓」就是現存在旭龢道的唯一一座修車房。如果你以為修車房一定昏暗污糟求其，那就大錯得錯了，位於旭龢道15號的石寓建於1923年，本來有三層高，但後來因預留空間興建赫頓大廈而拆卸第三層。要知道雖然現時香港的建築物普遍以鋼筋和混凝土建成，在二十世紀初期，這卻是大膽的嘗試，而石寓就是香港早期以鋼筋和混凝土建成的建築物之一，外牆則以磚頭和花崗岩碓砌而成，內外材料都堅固耐用，結構創新、外觀簡單之餘夠晒美觀實用。石寓門前有鮮紅色郵箱，上面印有騎馬勇士，由於沒有皇冠設計，估計和皇室貴族無關，應為私人特別設計。石寓內部超過三千呎，樓底高十三到十七呎，建有閣樓。鐵門、白色厚牆身，再加上裏面的螺旋樓梯，石寓充滿殖民地色彩。
石寓的門牌（圖片來源：Tere Wong – Flickr）
日佔時期結束後，石寓就不再是修車房。1949年，石寓就成為香港外國記者會的會所，當時的11名會員，大多是以前上海外國記者會的舊成員，及後記者會規模愈來愈大，石寓不夠地方，香港外國記者會就於1951年遷出至干德道。此後，石寓業權多次轉手，住過人，又做過鄧達智都去過的私房菜餐廳。
香港外國記者會由1951年遷入的干德道41A 大屋！！！後來於六十年代拆卸。(圖片來源：Gwulo)
1997年，石寓被列為三級歷史建築。即使成為古蹟，按政府定義，其實只是代表它具有若干價值，適合用某種形式保存，石寓依然能在樓市中出現，只要有資本，任何人都有機會擁有古董屋。最近一次拍賣，是在2006年，當時石寓以二千零五十萬售出，呎價約六千元，比叫價低百分之三十。現時，石寓為私人物業，不對外開放。
順帶一提，看到相片有沒有覺得似曾相識？石寓其實就是電影《新不了情》其中之一的取景地，《新不了情》的MV還可以見到少少石寓中的旋轉樓梯和黑色窗框的片段：
《新不了情》（1:14-1:40）
_____________________________________
我哋新書《香港柒錄》已經喺各大連鎖書店上架喇！
想睇更多香港的故事？ 歡迎同時緊貼追蹤我哋嘅
【Facebook – 刊登最新文章及城中熱話】
http://www.facebook.com/wetoasthk
【Website – 過去精選文章分類索覽】
www.wetoasthk.com
【IG – 互動IG Story多史旅行團】
http://instagram.com/wetoasthk
